Nossas auas. Nossas istorgias.
Noss auals e flums raquintan istorgias. Els fullan via davent da las funtaunas en las autas muntognas sur grippa, tras chavorgias e cuntradas alluvialas. Lur aua modellescha e caracterisescha nossas cuntradas, transporta crappa e glera, stgaffescha ina diversitad da spazis da viver per spezias raras d’animals e da plantas. Auas Grischunas envida da scuvrir da nov questas auas unicas e da procurar cuminaivlamain ch’ellas restian vivas er per las generaziuns futuras.
Noss flums e noss auals caracteriseschan las cuntradas en il pajais da las 150 valladas. Els èn spazis natirals plain vita, lieus da recreaziun attractivs e furneschan energia. Ma bleras auas èn sut squitsch: ellas èn chanalisadas, tschaffadas e svanidas en conducts. La midada permanenta da las deflussiuns en il tact da la producziun d’electricitad, substanzas nuschaivlas e la chalira èn in stress permanent per bleras auas. Quai ha consequenzas. Blers da noss flums e da noss auals han pers lur dinamica natirala e funcziuns ecologicas. Auas Grischunas s’engascha ensemen cun ina ferma allianza per auas vitalas en il Grischun.
Allianza Auas Grischunas
Auas Grischunas è l’allianza per flums ed auals vitals en il Grischun. Ella unescha organisaziuns che s’engaschan cuminaivlamain per la protecziun e revitalisaziun da noss flums ed auals. L’allianza cuntinua a crescher – ulteriuras organisaziuns èn cordialmain bainvegnidas. Er persunas privatas pon sustegnair nossa mira cun registrar e parter in messadi u cun ina donaziun.
I love Auas Grischunas
Es ti da la partida?
Registrar in messadi
T’engascha ensemen cun nus per auas vitalas. Parta tes statement persunal e gida a purtar vinavant las istorgias da nossas auas.
Donnaziuns
Cun tia donaziun sustegnas ti la lavur dad Auas Grischunas. Ensemen faschain nus visiblas las auas dal Grischun ed ans engaschain per lur protecziun a lunga vista.